Вечерва во Белград на стадионот „Рајко Митиќ“ ќе се соочат селекциите на Србија и Англија во рамките од квалификациите за Светското првенство, а пред овој натпревар капитенот на Англичаните, Хари Кејн зборуваше и за можните расистички навреди од трибините.

Напаѓачот на Баерн Минхен истакна дека е свесен за таквата можност и во репрезентацијата на „Гордиот Албион“ веќе разговарале на таа тема.

„Разговаравме за можните сценарија. Не сакаме да му даваме големо внимание на тоа, но ако се случи нешто, знаеме како ќе постапиме, исто како што направивме и во Бугарија во 2019 година“, изјави Кејн.

Натпреварот за кој зборува Кејн се играше во Софија и во него Англија победи со 6-0, но дуелот двапати беше прекинуван поради скандалозните скандирање. Бугарскиот фудбалски сојуз подоцна заработи и казна од УЕФА.