КАЗА БАР, општествено одговорен угостителски објект во срцето на Дебар Маало
Неодамна на нашиот официјален инстаграм-профил @slobodenpecat, сосема спонтано и автентично – на ваше барање, а на наше задоволство – започнавме иницијатива за поголема видливост на традиционалните медиуми преку понуда за читање весници во македонските угостителски објекти.
Препорачано
Еден од угостителски објекти кои се приклучија на иницијативата е култниот скопски бар Каза бар (Casa Bar) во срцето на Дебар Маало, а во продолжение ќе дознаете повеќе зошто Каза бар е омилено место на многу локалци, но и туристи.
Каза бар – динамично, култно место кое секогаш има што да понуди
Кога зборуваме за Дебар маало, неизбежно е да се зборува за Каза бар – место кое организира разновидни културни, забавни и гастрономски настани, но и домаќин на стари Скопјани кои утринското кафе го пијат баш тука.
Каза бар е присутен веќе 12 години на скопската угостителска сцена, а за динамиката на нивното постоење и долгата листа на настаните на кои биле домаќини, сметаме дека е невозможно да се вклопи во само еден текст.
Духот на местото вибрира позитивна и пријателска атмосфера, па затоа да се „фати“ место за пијалок на пространата маса во сончевите периоди од годината знае да биде вистински предизвик.
Доаѓањето на пролетта во Каза се празнува со ново, сезонско мени, па така, наскоро есенско-зимското мени ќе биде заменето со про(летно) и на редовната понуда ќе „пркнат“ и нови, одлични опции за пијалоци.
Кога сме кај пијалоците, навистина не’ импресионира тоа што со нас го сподели тимот на Каза – во ова место се одвојува големо внимание и посветеност на унапредување на вештините вработените!
Со цел да понудат одлични опции за пијалоци, Каза бар редовно овозможува патувања на својот тим за посета на регионални и светски бар-шоуа. Така, неодамна дел од тимот посетил бар-шоу во Атина, а во Скопје, освен со знаење, тимот се вратил инспириран за нов коктел-пијалок кој е достапен на менито и може да го вкусите – побарајте го под името „Атина“ (Athens).
Каза бар ги отвора и своите врати за сите млади кои сакаат да бидат дел од тимот.
Каза е препознатлива и по своите „флегшип“ (flagship) настани, па така, Скопјани итаат на веќе традиционалното првомајско празнување во Каза, која најдомаќински, на сметка на куќата ги пречекува своите гости со скара од култните Џоџос барбикју (Jojo’s BBQ) и пиво!
View this post on Instagram
Голем интерес има и за нивните новогодишни забави, но долго се зборува и за забавите под маски, па доколку уживаш во маскирањето, ова е локацијата на која сакаш да бидеш на Први април и Ноќта на вештерките (Halloween).
Чекај, имаме уште за споделување!
Погоре споменавме за тоа колку важно се перцепира културата на добар пијалок во Каза бар, меѓутоа мора да спомнеме за еден од многуте концепти на ова место. Штом настапи пролетта, секоја среда Каза бар станува домаќин на бармени од други барови низ Скопје, и тој ден, по промотивна цена, се пијат гостински коктели, целосно автентични на барот од кој доаѓаат. Од Каза бар велат дека ги поттикнуваат гостите да ги вкусат гостинските коктели, а со цел поголема видливост и унапредување на скопската бар-сцена и поголема видливост на талентираните локални бармени. Кул!
Исто така, Каза бар е голем поборник за поддршка на локалната сцена, па во текот на сончевите периоди во годината, викендите се резервирани за Супорт локал (Support Local) настани. Од штандови за локални рачни изработки до облека и храна, се чини дека тимот на Каза бар е константно фокусиран на тоа да понуди одлична атмосфера за сите генерации.
Во Каза бар има и тематски месеци на храна, па некогаш е месец на бургерот, некогаш на паста… Значи, во Каза бар може да се вкуси од такос до суши. Не ни ги споменавме сите истакнати моменти на Каза бар, но веруваме дека ви стана јасно дека Каза бар е место за сите генерации, со внимателно подготвена агенда, јасна цел и визија.
Каза бар е место во кое до 11 часот ќе се сретнете со „старите фраери“, во претпладневните часови ќе сретнете млади лица, навечер ќе споделите пијалок во опуштена атмосфера… или не, зависи кога доаѓате – затоа што Каза бар го има она што го бараат сите.
ЛОКАЦИЈА: Ѓуро Ѓаковиќ 66, спроти Министерство за култура
РАБОТНО ВРЕМЕ: Секој ден од 08:00 – 01:00
СЕ ЧИТАМЕ ВО КАЗА БАР!
