Евидентираните невработени лица во општина Кавадарци ќе можат да се вклучат во програмата за Општинско – корисна работа, за што Општина кавадарци денеска објави јавен повик.

Станува збор за работно ангажирање од девет месеци со скратено работно време (20 часа во неделата) заради стекнување на вештини и постепено вклучување на пазарот на труд. Во овој период влегуваат обуката и работниот ангажман. Како што информираат од кабинетот на градоначалникот Митко Јанчев, за време на работниот ангажман, статусот на невработените лица останува непроменет, а на невработените лица – корисници на паричен надоместок и на корисници на право на гарантирана минимална помош, за времетраење на работно ангажирање, ќе им биде активно претходно остварено право.

За кандидатите кои ќе бидат избрани и вклучени во програмата се предвидува месечен паричен надоместок во висина од 13.750,00 денари бруто износ за времетраењето на работното ангажирање, со вклучени данок на личен доход и осигурување за инвалидност и телесно оштетување причинето со повреда на работа и професионална болест.

За општествено-корисна работа може да се пријавуваат долгорочно невработени лица (над 12 месеци во евиденција, со предност на невработени лица над 5 години), млади лица до 29 години, корисници на гарантирана минимална помош, корисници на паричен надоместок по основ на невработеност, жртви на семејно насилство и самохрани родители.

Оние кои ќе бидат ангажирани како лични асистенти во средно училиште ќе треба да пружаат помош на децата со инвалидитет за извршување на секојдневните обврски во училиштето, да ги придружуваат децата до училиштето и враќање до дома по завршување на часовите, да ги придружуваат учениците за време на училишните одмори, да им пружаат помош на децата во спортските активности на часовите по физичко образование, потоа помош и поддршка на наставниците преку асистирање во реализацијата на наставните активности, помош и подршка на родителите преку соработка со истите, како и соработка со стручните соработници и инклузивен тим на ученикот.

Активностите се врз основа на договорот за соработка помеѓу Агенцијата за вработување на РСМ, Програмата за развој на Обединетите нации (УНДП) и општина Кавадарци, а програмата Општинско – корисна работа е финансирана од буџетот на Агенцијата за вработување на РСМ.