Портпаролот на Министерството за надворешни работи на Катар денес изјави дека треба да се разработат уште многу детали кога станува збор за планот од 20 точки на американскиот претседател Доналд Трамп за Појасот Газа.

Тој нагласи дека Катар и САД тесно соработуваат за да се договорат за спроведување на прекин на огнот кој нема да биде само привремен, објави Ројтерс.
Тој додаде дека е прерано да се зборува за алтернативи доколку планот на Трамп не успее.

„Во моментов постојат пречки за планот на Трамп, а тие вклучуваат спроведување“, рече портпаролот, додавајќи дека е прерано да се зборува и за отворање канцеларија на Хамас во Доха.

Белата куќа на САД претходно објави дека Трамп сака сите страни брзо да постигнат договор за условите за ослободување на заложниците во Појасот Газа.

Портпаролката на Белата куќа, Каролин Ливит, изјави дека техничките разговори што моментално се водат во Египет, во кои учествуваат специјалниот претставник на САД, Стив Виткоф, и зетот на Трамп, Џаред Кушнер, се фокусираат на деталите за ослободувањето на заложниците.

Неименуван функционер за Си-Ен-Ен изјави дека се очекува разговорите да траат неколку дена и дека во нив ќе учествуваат посредници од САД, Катар, Египет и Турција.