Катарскиот министер за надворешни работи Мохамед бин Абдулрахман Ал Тани изјави дека нападите на Израел врз верниците во џамијата Ал Акса се неприфатливи.

„Постојаното сквернавење на џамијата Ал Акса и израелските напади врз верниците се неприфатливи“, напиша Ал Тани на Твитер.

Тој додаде дека обидите на Израел да го промени историскиот и правниот статус на Ал Акса се исто така целосно неприфатливи.

„Меѓународната заедница мора да ги исполни своите обврски за заштита на правата на палестинскиот народ“, рече Ал Тани.

Палестинските власти вчера предупредија дека израелските провокации ќе го претворат комплексот Ал Акса во окупираниот Источен Ерусалим во бојно поле.

Насилството ескалира низ палестинските територии откако израелската полиција изврши напади врз верниците во Ал Акса оваа недела. Израелските напади врз џамијата предизвикаа ракетни напади од Појасот Газа и Либан, а Израелците возвратија со воздушни и артилериски гранатирања.