Универзитетот „Мајка Тереза“ во Скопје (УМТ) избира нов ректор, третпат во историјата на овој државен универзитет. Двајца од тројцата пријавени кандидати влегоа во трката за нов ректор за периодот од 2025 до 2028 година – проф. д-р Беким Фетаји и проф. д-р Блерим Саити.

Беким Фетаји е редовен професор на Факултетот за информатички науки при Универзитетот „Мајка Тереза“, а Блерим Саити е редовен професор на Факултетот за социјални науки на истиот универзитет.

Изборот ќе се одржи во среда, со тајно гласање од страна на членовите на Наставно-научниот совет на УМТ.

ТВ „Клан“, повикувајќи се информација од социјалните мрежи, вчера објави фотографија од свидетелството за завршена втора година средно образование на кандидатот за рекот на УМТ, Блерим Саити. Станува збор за учебната 1991/1992 година во Средното општинско училиште „Здравко Чочковски“ во Дебар.

Впечатливо е тоа што од 13 предмети Саити има само една „четворка“ и тоа по предметот Ликовно образование, а по другите предмети оценките му се „двојки“.

„360 степени“ ги контактирал двајцата кандидати за ректор. И двајцата одбиле да дадат изјава во врска со изборот, како и за образованието на Саити. Тој најавил дека откако ќе заврши изборот, ќе одржи прес-конференција на која ќе одговори на прашањата поврзани со објавите што изминатите денови кружат на социјалните мрежи и во дел од медиумите, а се поврзани со неговото образование.

Блерим Саити според звањето е професор по физичко образование. Според неговата биографија, дипломските и магистерските студии ги завршил на Институтот за физичка култура на Универзитетот во Тирана, а во 2013 година докторирал на Факултетот за физичка култура при Универзитетот „Свети Кирил и Методиј“ во Скопје. Во декември минатата година Сенатот на УМТ го избрал Саити за проректор за меѓународни односи.