Осомничениот за терористичкиот напад со автомобил во кој загинаа четворица членови на муслиманско семејство во јуни 2021 година во Канада, се изјасни за невин на почетокот на неговото судење во вторникот.

Натаниел Велтман, кој имаше 20 години кога беше уапсен, се појави за време на процесот за избор на поротата пред судот во Виндзор, град во јужниот дел на провинцијата Онтарио.

„Сè помина добро. Тој се изјасни за невин по пет обвиненија и ние ја избравме поротата“, изјави неговиот адвокат Кристофер Хикс за AФП.

Велдман е обвинет за четири точки за убиство од прв степен и едно обвинение за обид за убиство по нападот, кој канадскиот премиер Џастин Трудо го нарече „ терористички чин“.

Пет членови на исто семејство биле прегазени со автомобил додека чекале да преминат преку премин во градот Лондон, 200 километри југозападно од Торонто. Загинаа двајцата родители, нивната 15-годишна ќерка и нејзината баба, додека нивниот 9-годишен син беше тешко повреден, но преживеа.

Според локалната полиција, Велтман намерно го возел својот пикап кон семејството Афзаал со „предумисла и планиран чин мотивиран од омраза“.

Ниту едно од овие обвинувања се уште не е докажано на суд.

„Незамисливото насилство со кое се соочи ова семејство треба да послужи како поука за целата земја“, рече пред судот Аасија Кан од Националниот совет на канадските муслимани.

„Со нетрпение очекуваме да видиме како нашиот правосуден систем испраќа порака дека сите Канаѓани мора да бидат заштитени од тероризам, без оглед на етничката припадност или идеологијата на напаѓачот“, додаде тој.

Судењето се очекува да трае повеќе од три месеци, според адвокатот на Натаниел Велтман.

Оваа трагедија е најкрвавиот напад што е извршен врз муслиманите во Канада, по вооружениот напад на џамијата во Квебек кој ги однесе животите на шест лица во 2017 година. Меѓутоа, на сметка на сторителот на овој напад, канадски поддржувач на т.н. „белата надмоќ“, не беа покренати обвиненија за тероризам.