Канадскиот премиер Марк Карни во средата го осуди рускиот упад со беспилотни летала во полскиот воздушен простор како „неодговорен и ескалациски“ и рече дека Отава е во тесна координација со своите сојузници од НАТО.

Карни во соопштението изјави дека инцидентот ја покажува потребата од зголемување на притисокот врз рускиот претседател Владимир Путин за прекин на војната во Украина, пренесува Ројтерс.

„Ќе останеме будни против обидите на Русија да го прошири и продолжи конфликтот со Украина. Путин уште еднаш покажува целосно непочитување на патот на мирот“, рече тој.

Канада е еден од „најгласните“ бранители на Киев на меѓународно ниво и се обврза да испрати милијарди долари финансиска и воена помош.

Канадската министерка за надворешни работи, Анита Ананд, претходно изјави дека упадот е „уште еден ужасен пример за одбивањето на Путин да бара мир“.