Перманетните кампањи преку кои партиите секојдневно ги бомбардираат гласачите може да предизвикаат контраефект, да го затапат интересот и да го намалат прагот на приемчивост на политичките пораки. Пораки за „живот или смрт“, полни со страсти и запаллива реторика, може гласачите да ги натера да останат дома, сметаат политички аналитичари и комуниколози.

Власта и опозицијата наголемо тераат кампања. Се бараат и измислуваат поводи само за да се биде присутен во јавноста, а изборите се в година. По летното привидно затишје, вчера едните почнаа кампања „Ние сме Европа“, другите, пак, прославуваа роденден на партиски комитет.

И комуникологот Бојан Кордалов и политикологот Марко Трошановски сметаат дека во дигитално време не е спорно кампањите на партиите да се перманентни.

– Сепак, не е позитивно за граѓаните, а од пораките што ги добиваме, очигледно ниту за меѓународните пријатели, темата на таквите кампањи да биде несогласување околу иднината на земјата. Теми како европската и НАТО-интеграцијата за нас значат подобар стандард, интеграција и подобри услови за живот. И, ако тука имаме разлики, и на такви теми водиме кампања и ги ставаме во партиски контекст, партиите ризикуваат граѓаните да ја загубат довербата во евроатлантската перспектива, а тоа значи губење доверба во подобар стандард, подобри плати, поорганизирана држава…. Значи, сè што е важно за нас, а не за меѓународната јавност – вели Кордалов.

Ковачевски од првата трибина „Ние сме Европа“ порача дека кампањата е со цел приближување на европските вредности до граѓаните. Во врска со изјавата на францускиот претседател Емануел Макрон за „Европа со повеќе брзини“ не пропушти да ги демантира „пропагандистите платени од трети држави кои не сакаат да ја видат оваа држава во ЕУ“, додавајќи дека тие структури од „поранешните служби на државна безбедност“ не сакаат да ја видат оваа држава во ЕУ, а нивните бизниси „единствено можат да работат во изолирана држава“.

Лидерот на ВМРО-ДПМНЕ Христијан Мицкоски од роденденска прослава на партискиот комитет од Штип, пак, побара изборна победа со најмалку 61 пратеник.

– Погледнете го Ковачевски како блед се врати од Блед. Францускиот претседател им ја кажа вистината. Сега се прпелкаат, тоа што го кажуваат не е точно. Јасно е дека без внатрешни реформи без оправање на секторите и состојбите на секое поле, нема да има ни африканска унија, а не пак европска. Народот бара ресет – рече Мицкоски.

Политикологот Марко Трошановски вели дека социјалните медиуми придонеле партиите постојано да бомбардираат со пораки за да одржат фокус и да привлечат нови гласачи.

– Меѓутоа, се пренебрегнува влијанието на тоа дека со постојано изложување на човек на нешто, па макар и на политичка порака, се отапува неговиот интерес и се намалува прагот на приемчивост на политички пораки кај граѓаните. Тоа резултира со намалување на излезноста на изборите, односно незаинтересираност за политика. Тоа придонесува и помалите партии кои сакаат понасочено да комуницираат, да немаат избор, па и тие да бидат постојано присутни. На крај жртва се јавноста и јавното мислење, зашто се прибегнува кон површни, спектакуларни и сензационалистички политички пораки и популизам, кои многу полесно будат емоции и мобилизираат, но не оставаат простор за разумна и суштинска дебата за политичката понуда и решенија кои партиите ги нудат. Тоа е замката на постојана политичка кампања – вели Трошановски.

При изложеност на граѓаните на перманентна кампања, партиите за да поентираат во предизборна кампања треба да нудат решенија на теми кои суштински ги засегаат граѓаните, како платите, намалување на цените, поефикасна борба со корупцијата…

– Но ако дебатираат на теми како што знаат – за „живот или смрт“ – тогаш реториката постојано ќе се вжештува, страстите ќе се разгоруваат и во рамки на предизборната кампања може да видиме реторика која што буквално ќе биде прерадикална и која нема да доведе до тоа луѓето да бидат целосно информирани како да гласаат, туку буквално да се кријат од политиката и да останат дома или да гласаат со вжештени страсти наместо на база на аргументи и дебати – вели Кордалов.