По проблемите кои се појавија во изминатиот период Иван Перишиќ ќе го напушти тимот на Хајдук.

Тренерот Џенаро Гатузо пред неколку дена го исфрли Перишиќ од првиот тим, а по натпреварот против Локомотив кој се играше пред два дена објасни и зошто го направил тоа.

Перишиќ непосредно пред почетокот на сезоната побарал трансфер и таквиот однос не му се допаднал на Италијанецот кој е познат по својата дисциплина.

Денеска спортскиот директор на тимот, Никола Калиниќ потврди дека Перишиќ заминува, само останува уште да се утврди начинот на кој ќе го напушти клубот.

„Перишиќ си заминува, тоа е сигурно. Во наредните денови ќе утврдиме дали тоа ќе биде во трансфер или со прекин на договорот. Во изминатите денови се случија некои работи кои донесоа недоразбирање од двете страни кои сакаат на мирен начин да стават крај на соработката“, изјави Калиниќ.

Перишиќ со голема еуфорија беше дочекан во Сплит, но очигледно очекувањата кои ги имаа клубот и навивачите од него тој не ги исполни.