Калин Ивановски го загуби мечот на стартот од Челинџер 75 турнирот во Нотингем, Велика Британија, што се игра за награден фонд од 91.250 евра.

Поуспешен од македонскиот тенисер во израмнет меч беше петтиот носител Дино Прижмиќ од Хрватска со 2:0 во сетови 63, 7:6 (3) за два часа игра.

Првиот сет го доби Прижмиќ со 6:3 во гемови и откако на стартот од мечот направи брејк во вториот гем и потоа имаше предност од 3:0.

Ивановски во првиот сет во петтиот гем не искористи брејк топка за да намали на 3:2, а ривалот ја зачува предноста – 4:1. Во вториот сет ниту еден од двајцата тенисери не успеа да направи брејк. Македонецот во седмиот гем успеа да спаси брејк топка, а потоа во следниот гем не успеа да реализира три брејк топки и резултатот беше 4:4 во гемови. При водство на нашиот тенисер од 6:5 во гемови во 12. гем Ивановски имаше брејк и сет топка, но една спорна судиска одлука го спречи да изедначи на 1:1.

Во 13. гем хрватскиот тенисер ја искористи смиреноста и поведе со 6:1 на поени, Ивановски намали на 6:3. Сепак на крај сетот му припадна на Прижмиќ со 7:6 и 7:3 на поени. Двајцата тенисери беа доминантни кога се наоѓаа на сервис (Ивановски имаше седум ас сервиси).