„Комисијата за помилување не призна грешка, како што тврди Мицкоски, туку дека се држи до принципи“, напиша на Фејсбук професорот Гордан Калајџиев кој во саботата поднесе оставка од член на Комисијата за помилување заедно со останатите членови на ова тело.

Мицкоски на вчерашната прес-конференција рече дека со оставката членовите на Комисијата за помилување ја констатирале направената грешка и дека е доблесно да преземат одговорност.

„Жив човек којшто работи знае и да погреши, кога ќе се констатира грешката, ако се преземе одговорност тогаш тоа е и доблесно и јас така можам да ја коментирам одлуката на членовите на Комисијата која се занимава со областа на помилувањето. Констатирана е очигледно грешката и единственото нешто што го имаат тие и како морален чин е да се повлечат, а тоа и го направија. Очекувам тука да се затвори оваа тема во јавноста“, изјави Мицкоски.