Минатата година пазарот на трудот во Србија, но и пошироко се соочи со голем недостиг од работници, особено занаетчии, покажува истражувањето на Инфостуд. Недостигот од занаетчии се одразил и на нивните плати, па така највисока просечна плата заработиле каросериските работници со 176.000 динари, додека возачите имале просечна плата од 120.000 динари, пренесува Данас.

Освен за овие занаети, српската економија најголема потреба има за фризери, ѕидари, автомеханичари, лимари, армирачи, пекари, металостругари, месари, козметичари, водоинсталатери и готвачи.

Според Ѓокица Јовановиќ, социолог и универзитетски професор во пензија во Србија, постои видлива, опиплива, конкретна потреба од овие професии, а српското општество е сведено на ниво на елементарни потреби.

Небојша Атаначковиќ, бизнисмен и почесен претседател на Синдикатот на работодавачи, истакнува дека резултатите од истражувањето не се изненадување.

„Најценето и најскапо е нешто што не е доволно во понуда, а тоа ги вклучува сите занаети што со години не можеме да ги одржуваме на потребниот број. Дел од проблемот се однесува на негативниот демографски тренд кој кај нас е присутен со децении. Мал број луѓе се обучени за занаетчиство, а добар дел од нив мигрираат во Западна Европа. И второ, економијата не е во состојба да се натпреварува со опциите за исплата на платите што ги има Западна Европа“, смета тој.

Од друга страна, Ранка Савиќ, претседател на Сојузот на слободни и независни синдикати, исто така забележува дека образовниот систем го обесхрабрува занаетчиството.

„Кога имате образовен систем кој ги обесхрабрува занаетите, и преку системот за плаќање и наградување, тогаш тие професии стануваат барани, или подобро кажано, дефицитарни на пазарот. Никој не зборува за тоа, но најголемиот одлив на работници од Србија во Европската унија бил токму во овие занаетчиски професии. Кога имаш недостиг од работна сила, нормално е цените на тие услуги вртоглаво да растат, што ни се случува денес“, вели таа.

Жељко Веселиновиќ, претседател на синдикатот „Слога“ вели дека одливот на работници во странство е една од главните причини за недостигот на занаетчии во Србија.

„Тоа се професии кои некогаш, релативно кажано, беа резервирани за „најлошите ученици“. А денес, со оглед на тоа што едноставно ги немаме тие занаетчии, без разлика дали занаетчиите се заминати во странство или имаат многу работа, особено оние поврзани со автомобили, тоа се, можам да кажам, најплатените професии. Значи, доаѓаме до ситуација во која едноставно нема квалитетна работна сила во смисла дека има недостиг на кадар и дека секој што знае како да го направи тоа веројатно, според мене, заминал во странство“, заклучува тој.