Повеќе од 25 милиони Американци редовно играат голф секоја година. Бидејќи не се сите толку вешти како познатиот играч Тајгер Вудс, тие губат околу 300 милиони топки годишно на терените. Но, лошите голферски потези на една личност, претставуваат деловна можност за другите. Во Америка, порасна пазарот на користени топчиња за голф, чија вредност во САД е околу 200 милиони долари годишно, а со овој бизнис претежно се занимаваат помали компании. Ако сте спремни да се борите за топчиња во матна вода полна со некакво ѓубре и со алигатори, можете да станете милионер.

Статистичарите во САД дури бројат колку играчи на голф таму губат топки за време на натпреварот. А податоците покажуваат дека просечниот американски играч на голф губи по четири до пет топки во круг, додека полошите губат уште повеќе. Кога ќе се земе предвид дека над 25 милиони Американци играат голф секоја година, тоа значи дека околу 300 милиони топки годишно завршуваат некаде во шумата, во клисурите, на дното на езерата… Има и проценки дека ако сите топчиња би биле пронајдени и распоредени едно до друго, патеката на лошите голфери би се протегала од Њујорк до Хонгконг.

На почетокот на минатиот век, најснаодливите тренираа кучиња да наоѓаат топчиња што ги изгубиле голферите во текот на играта, а потоа да ги продаваат на клубовите за 10 центи по парче. Повеќето од овие претприемачи немаа дозвола да шетаат по јавни и приватни имоти во потрага по профит и беа третирани како ситни крадци. Подоцна и поголемите сфатија дека таму има пари, па почнаа да никнуваат фирми кои склучуваа договори и врз основа на тоа добиваа дозволи да бараат и продаваат искористени топки. Но, оваа индустрија навистина тргна нагоре дури на почетокот на овој век, благодарение на новите технологии. Во моментов, десетина американски компании наоѓаат, чистат и продаваат користени топчиња за голф преку Интернет. Најголемата од овие компании, ПЏ Голф, продава околу 50 милиони искористени топки преку својата веб-страница секоја година, пишува Каматица.