Поради зголеменото количество на акриламид, од пазарот во соседна Хрватска пред неколку дена е повлечен чипсот „аро“ со пипер во пакувања од 300 грама. На нашиот пазар овој производ не беше откриен, но темата повторно го покрена прашањето за акриламид во храната, бидејќи постои долга листа на производи во кои може да се најде.

Акриламид е хемиско соединение кое се формира во храната при термичка подготовка како печење или пржење. Неговото формирање во текот на овој процес не може да се избегне, но количината на акриламид зависи од квалитетот на суровините што се користат за производство на храна, анализира Политика рс. Овој проблем долго време е во фокусот на Европската агенција за безбедност на храна ЕФСА, а од 2015 година стана и јавно здравствен проблем, бидејќи истражувањата покажаа дека може да биде канцероген.

Сепак, дозволените вредности што може да се внесат во организмот преку храната се уште не се пропишани, но е дадена таканаречената граница на изложеност, која може да биде опасна. Од 2018 година, исто така, донесена е уредба со која се наложуваат производителите да применат мерки за намалување на содржината на акриламид, особено за производите направени од компири, житарки, фини пекарски производи, кафе и храна за бебиња.

Воведени се и референтни вредности за одреден вид храна, а се покажа дека три години по донесувањето на регулативата е постигната целта за намалување на содржината на акриламид во производите. Но, на пазарот од време на време се појавуваат примери во кои контролите утврдиле дека концентрацијата на акриламид е над дозволената граница, поради што потрошувачите се вознемирени.