Апликацијата „Скај“ која беше спомената во извештаите за озогласената група од селото Грчец, важеше за клучна алатка во комуникацијата меѓу криминалците низ светот, сè до нејзиното затварање по големите рации кои ги изврши Европол низ неколку европски земји во 2021 година.

Како што веќе соопшти Министерството за внатрешни работи, криминалната банда од Грчец преку оваа апликација ја договарала трговијата со дрога.

– Оваа криминална група, плановите и договорите за извршување на кривичните дела ги правела преку непосредни контакти или со користење на енкриптирани телефони во кои била инсталирана апликацијата „Скај“, а која ја користеле членовите на организираната криминална група, изјави доскорешниот министер Оливер Спасовски на прес-конференцијата на која објави детали за акцијата.

Но, како всушност функционирала апликацијата која криминалците ја користеле за трговија со дрога?

Креирана во Ванкувер, Канада во 2008 година, апликацијата за кратко време станала најголемата светска мрежа за шифрирани пораки, а функционирала преку три сервери на компанијата ОВХклауд во Рубе, Франција.

Секој нов корисник кој сакал да се поврзе на мрежата, требало најпрво да издвои меѓу 800 и 2.500 евра за шест месеци, а таа на почетокот била наменета за уредите на Блекбери, мобилни телефони кои некогаш беа многу популарни пред да се појават јужнокорејскиот Самсунг и американскиот Епл.

Слична на апликациите кои секојдневно ги користиме, како „Вибер“ или „Вотсап“, на таков начин функионирала и „Скај“. Можело да се праќаат само текстуални и гласовни пораки, како и фотографии и видеа, но секако само меѓу корисниците на апликацијата.

По некое време, креаторите на апликацијата ја направиле достапна и за останатите уреди кои ги имаат системите на „андроид“ и „ај-о-ес“ на ајфоните.

Додека еден корисник ја користел апликацијата, автоматски се вклучувала забрана за следење на ГПС сигналите, како и за камерата и микрофонот, што на властите значително им го отежнувал патот до криминалците.

Пораките испратени преку оваа апликација исчезнувале 48 часа по испраќањето, нешто што го користат и други апликации, особено познати кај помладите корисници, како „Снепчет“, која автоматски ги брише прочитаните пораки или фотографии по 24 часа.

Безбедноста на апликацијата била на највисоко ниво, а тоа го докажува и фактот што доколку корисникот неколку пати ја промашил лозинката, автоматски се губеле сите контакти и пораки кои биле испратени претходно.

Креаторите на апликацијата биле толку сигурни дека никој програмер или хакер не можел да го пробие нивниот систем, што дури нуделе 4 милиони долари за оној кој за 90 дена ќе успее во тоа.

Над 170.000 корисници на „Скај“ биле регистрирани низ Европа, Северна Америка, неколку земји од Централна и Јужна Америка (главно Колумбија), како и неколку од Блискиот Исток. Најголем број на корисници имало од Холандија (12.000) и Белгија (6.000). Во овие две земји всушност беа затекнати криминалните активности.

Во серија полициски рации против криминалните организации на почетокот на 2021 година, беше разоткриен дел од инфраструктурата на „Скај“ во Западна Европа, а американското Министерство за правда тогаш издаде налог за апсење на извршниот директор на компанијата Жан-Франсоа Ип.

„Органите на прогонот заедно со судовите во Белгија, Франција и Холандија во тесна соработка овозможија големи интервенции за блокирање на понатамошната употреба на шифрирани комуникации од големи организирани криминални групи“, наведе тогаш Европол во официјалното соопштение.

Ова го означи падот на „Скај“.

Оттогаш, веб-страницата е под контрола на американското ФБИ, а апликацијата е тргната од сите мобилни уреди.

Апликацијата повторно стана тема во јавноста, откако емисијата КОД на „Телма“ објави дека групата од Грчец, чиј лидер Шеваљ Муареми е во бегство во Дубаи, ја користела за да разменува пораки со кои ја организирале трговијата со дрога.

Инаку, според податоците на Европол, во Македонија имало 1.800 корисници на оваа апликација.

Минатата недела, МВР соопшти дека се извшрени серија претреси во Грчец, каде беа упасени членови на криминален клан, кои биле поврзани со трговија со дрога и убиства.