Одморот во Сардинија остави мешани впечатоци кај туристка од Србија поради необична практика на плажа: наплаќање за туширање. Таа вели дека е навикната на разни услуги на плажите, но фактот дека користењето на туш  на плажа се наплаќа едно евро по лице ја изненадил, и како што вели, ѝ го расипал општиот впечаток за одморот – пишува Каматица.

Нејзината мајка се огласи на социјалната мрежа X за да го сподели своето разочарување од потегот, истакнувајќи дека би било поприфатливо да се вклучи цената на туширањето во цената на другите услуги, како што се лежалки или храна. На овој начин, туристите би биле позадоволни, без да се чувствуваат како да им се наплаќа за основна потреба.

Објавата предизвика жестока дебата на социјалните мрежи, откривајќи дека оваа практика не е невообичаена. Многумина потврдија дека наплатата за тушеви е сè почеста, не само во Сардинија, туку и на популарните дестинации во Црна Гора, Грција и Турција, па дури и во Хрватска.

Поддржувачите на таквата наплата објаснуваат дека водата на островите е скапоцен ресурс и дека наплатата е логичен начин да се спречи расипништвото. Тие исто така додаваат дека тушевите треба да се одржуваат, чистат и да се снабдуваат со топла вода, а сето тоа повлекува одредени трошоци. Овие корисници веруваат дека наплатата треба да биде уште поголема, со цел да се подигне свеста за вредноста на водата, особено на островите каде што нејзините извори се ограничени.