Лето – омиленото годишно време ни е во мислите во текот на целата година, бидејќи ја храни нашата душа. Сонце, море, плажа, патувања, посета на магични градови, чисто задоволство…

Во оваа летна приказна не се исклучок ниту нашите јавни личности. Иако ним најчесто летниот период им е исполнет со професионални ангажмани, секако сакаат да најдат слободно време за летен одмор, да се растоварат од обврските, да побегнат од градскиот метеж и вжештените улици.

Дел од нив за „Слободен печат“ открија како го поминуваат летото, кои им се омилените места за летен одмор во Македонија и надвор од нејзините граници и која им е дестинација од соништата.

Дарија Андовска

Кога зборуваме за уметници што достоинствено и успешно ја претставуваат наша држава во светот, меѓу првите на списокот е нашата истакната композиторка, професорка и од неодамна декан на Факултетот за музичка уметност, Дарија Андовска. Жена со посебна харизма и ведар дух, која го прошетала речиси целиот континент и ова лето нема да ги одмине патувањата.

Како ќе го поминеш летото?

– Доминантно работно, но и со задолжителната доза море и шетање по светот. До неодамна, паралелно со тековните обврски како професор и декан, работев на најновите композиции, кои ќе имаат светска премиера во Швајцарија во август. Август, освен за пат во Швајцарија, веќе е резервиран за работа на друга нова композиција, која ќе има светска премиера во декември.

Во меѓувреме – на море, кај ајкулите. Ова ќе биде третпат како одам во Египет, нека му ја мислат ајкулите.

Дали имаш професионални ангажмани?

– Уметниците најчесто го користат летото за многу поинтензивна работа, неоптоварени со секојдневните вообичаени обврски во текот на годината. Така и јас. Професионалните ангажмани не мируваат, туку се интензивираат, барем во креативната сфера.

Како го замислуваш твојот одмор од соништата?

– Не го замислувам, се обидувам секој одмор да го направам одмор од соништата. Имам среќа што сум прошетала сериозно добар дел од светот – од далечниот исток, преку Европа (речиси целосно), низ Африка до американскиот континент.

Но, каде и да оди човек, оди, пред сè, со себе – ако не ти е ок со себе, не може никаде да ти биде одмор од соништата.

Но, да, има некои нешта што ги претпочитам, како истражување и откривање различни култури и поинаков начин на живот, по можност постојано во движење (живот во куфер, секој ден на друго место) и си имам дадено задача барем еднаш во годината да појдам во земја во која никогаш не сум била.

Омилено место во Македонија за бегање од секојдневието?

– Кај мене во глава. Многу е забавно и секогаш има нешто ново (се смее). И каде било во природа, но и чудесни места – повторно, по можност првпат да сум таму, за да истражувам и откривам, да ја запознаам подобро Македонија, која е раскошна комбинација на природа која го одзема здивот, историја и традиција, заедно со топли и гостопримливи локалци.

Зарина Првасевда

Љубовта кон традиционалната музика, природата и културата на народите, Зарина Првасевда ја прави единствена во она што го прави. Пејачка, која во својата музика го преточува токму тој, исконскиот традиционален код што го носиме во себе. Соодветно со она што го прави, таа за одморање на душата и телото секогаш одбира рурална средина, а ова лето ги комбинира работата и уживањето.

– Првата третина од летото оваа година го поминав работно, со концерти, настани и снимања. Втората ја поминувам во с. Љубаништа, Охридско, и веќе во третата одиме со нови сили кон нови победи, се враќам работно и фокусирано.

Дали имаш професионални ангажмани?

– Се разбира, веднаш по одморот, кој ми завршува на 15 август, заминувам за Франција каде што имам концерти, а потоа и за Веспрем, Будимпешта… Шибеник… и многу други.

Како го замислуваш твојот одмор од соништата?

– Одморот од соништата е куќа во длабока борова сенка, до/близу/со поглед на морето. Некој до мене што ќе готви нешто вкусно за мене, апсолутна тишина за сѐ, освен за звукот на птици, гранки и бранови, книгичка в рака…

Омилено место во Македонија за бегање од секојдневието?

– Рурално, само рурално. Една куќичка покрај река во село Пласница засега ми е во убедливо водство или мојата во село Љубаништа.