Во пресрет на доекипирање на Уставниот суд и барањето на пратеникот на Демократски сојуз Павле Трајанов да се допрецизираат критериумите при избор на уставните судии, претседателката на Уставен суд, Добрила Кацарска за „Слободен печат “ вели дека Уставот во член 109, став 4, предвидел дека судиите на Уставен суд се избираат од редот на истакнати правници и смета дека критериумите може да се доуредат со нов закон за Уставен суд.

-Мојот личен пример е дека бев предложена од фелата-односно од Судскиот совет со сите 12 гласа и јас поддржувам транспарентен процес за избор на професионалци, правници со кредибилитет и интегритет. Критериумите веќе се предвидени во Уставот, иако сметам дека може да се доуредат со нов закон за Уставниот суд- вели Кацарска.

Претседателката додава дека Уставниот суд подготвува голема реформа преку донесување нов акт, кој ќе одговори на сите потреби во поглед на организирањето, начинот на работа и постапката и ќе биде софистицирана верзија во споредба со досегашниот Деловник кој датира од 1992 година. Сепак, Кацарска вели дека за да се донесе актот за кој веќе е изготвена нацрт верзија која е разгледана од актуелните судии и се консултирани универзитетски професори, експерти по уставно право, прво треба да се комплетира Уставниот суд, по што нацрт верзијата ќе биде објавена и отворена за предлози и за поширока стручна дебата како значаен елемент на еден инклузивен процес, кој особено го цени Уставниот суд со цел да се вклучат сите добри и применливи предлози за подобрување на функционалноста на Уставниот суд.

– Ставот на Уставниот суд во поглед на прашањето за Закон за уставен суд е веќе познат и јавно судиите ја изразувале потребата од негово донесување. 30 години наназад се поставува истото прашање за потребата од закон за Уставниот суд и мислам дека крајно време е законодавецот да го донесе, со внимателност да не навлегува во постапката која е предвидена сега со Деловникот, а верувам набрзо и во новиот Акт, затоа што тоа  Уставот во член 113 предвидел дека работата и постапката  пред Уставниот суд се уредуваат со акт на Судот – вели Кацарска.