Јужнокорејскиот претседател Ли Џе-мјунг денес изјави дека планира значително да ги зголеми трошоците за одбрана за подобрување на високотехнолошкото оружје и изградба на посамостојна војска, пренесува Кореа Хералд.

На церемонијата по повод Денот на вооружените сили, Ли ја нагласи потребата Јужна Кореја да може самостојно да ја брани својата територија и мир, нагласувајќи дека воениот сојуз со Соединетите Американски Држави се смета за „солиден“, објави  истиот извор.

За 2025 година, Ли најави зголемување од 8,2 проценти на буџетот за одбрана за воведување напредни системи за оружје, вклучувајќи борбени роботи со вештачка интелигенција, автономни беспилотни летала и прецизни ракетни системи.

Владата, исто така, планира да ја поддржи одбранбената индустрија и да ги подобри условите и надоместоците за војниците.

Претседателот истакна дека трошоците за одбрана на Јужна Кореја ги надминуваат оние на Северна Кореја за 1,4 пати, а зајакнувањето на воената подготвеност има за цел да ги одврати потенцијалните закани од Пјонгјанг, кој поседува нуклеарно оружје.

Прашањето за префрлање на оперативната контрола на јужнокорејската војска во време на војна останува чувствително, забележува АП.

Ли повтори дека Јужна Кореја води заедничка одбранбена позиција со САД, зајакнувајќи ги комбинираните капацитети за регионален мир и стабилност.

Подсекретарот на Трамп за одбранбена политика, Елбриџ Колби, рече дека администрацијата внимателно го разгледува префрлањето на оперативната контрола и го поддржува зајакнувањето на способните сојузници, вклучително и Јужна Кореја.