Ирскиот рок бенд „Ју ту“ ќе ја добие највисоката чест на Академијата Ајворс – почесно членство – на овогодинешните награди за филмски композитори и текстописци, објавија организаторите.

Боно, Еџ, Адам Клејтон и Лери Мулен Џуниор, ќе им се придружат на Пол Макартни, Елтон Џон и Кејт Буш кои претходно станаа почесни членови на Академијата Ајворс, британско непрофитно професионално здружение на текстописци и композитори.

Нивните текстови се познати по „емотивната автентичност што ги создаде некои од најмоќните песни во историјата на рок музиката“, објави Академијата Ајворс, наведувајќи ги особено хитовите „Ќе следам“(I Will Follow,) „Гордост (Во името на љубовта) Pride (In The Name of Love), „Сè уште не го најдов она што го барам“ (I Still Haven’t Found What I’m Looking For) и „Со или без тебе“ (With or Without You).

Формиран во Даблин во 1976 година, „Ју ту“ продаде повеќе од 175 милиони плочи и доби голем број признанија, вклучувајќи и четири Ајворс. Со познатите ирски рокери, бројот на почесни членови на академијата се искачи на 32. Минатата година американскиот рокер Брус Спрингстин стана првиот меѓународен композитор кој ја доби оваа висока чест.

Именувани по Ајвор Новело, велшки актер и забавувач од 20 век, наградите првпат беа доделени во 1956 година. Овогодинешната церемонија ќе се одржи на 22 мај во Лондон.