На Андроид и ИОС уредите од денеска е достапна апликацијата „Parking.MK“ на ЈП „Градски паркинг“ – Скопје за зонско паркирање. Апликацијата е бесплатна и нуди можност преку ГПС да се утврди локацијата на возилото, како и плаќање преку дебитна или кредитна картичка.

Следејќи ги трендовите за дигитализација на услугите, ЈП „Градски паркинг“- Скопје денеска ја пушти во употреба апликацијата Parking.MK за зонско паркирање која ќе биде достапна за користење на IOS и ANDROID уредите. Апликацијата е бесплатна за симнување, едноставна за примена и нуди низа поволности, меѓу кои, можност преку ГПС прецизно и точно да се утврди локацијата на возилото на корисникот, а со тоа и зоната на паркирање, потоа брзо и безбедно плаќање со наведување на дебитна или кредитна картичка, листа на историја со плаќања и слично – се наведува во соопштението.

Од Претпријатието велат дека по воспоставување на трите начини на плаќање, преку СМС порака, Кју-ар код и грепки, ова е уште едно олеснување за корисниците.

Целта на Град Скопје и ЈП „Градски паркинг“ е постојано унапредување и подобрување на услугите за граѓаните кои ги користат јавните паркиралишта, особено преку можноста едноставно, брзо и паметно да се плати паркинг услугата – се додава во соопштението.