Педесет и пет пати сум носен во болница. Пред малигнитет сум. Јас не сум експериментален глушец. Ве молам судијке да не си играте со мојот живот. Ова денеска во судница во Кривичниот суд го изјави првообвинетиот во аферата „Рекет“ Бојан Јовановски.

– Eден кажува едно, друг друго, за да на крајот обвинителката Вилма Русковска констатира дека сум во добра здравствена состојба – рече Јовановски.

Тој и денеска на судијката во овој предмет Васка Николовска – Масевска и се пожали за, како што рече комплицираната своја здравствена состојба и за игнорантскиот однос на лекарите кон него.

Јовановски на судијката и нагласи дека неговата здравствена состојба не се подобрува, туку напротив се влошува, на што од страна од судот беше советуван дека може да побара од судот одобрение за било каков лекарски преглед или пак да побара домашен како замена за затворски притвор.