Во Собранието на Македонија денеска се одржа свечена церемонија на која беше доделена државната награда „8 Септември“ за животно дело, а добитник на ова значајно признание е селекторот на македонската одбојкарска репрезентација, Јошко Миленковски.

Миленковски ја доби наградата како признание за неговиот огромен придонес во развојот на спортот во земјава и за афирмацијата на Македонија на меѓународната спортска сцена.

Во својата богата кариера, Миленковски освои вкупно 28 пехари, меѓу кои се издвојуваат 15 шампионски титули со Работнички Фершпед, како и 13 национални купови, 12 со Работнички и еден со Борец Универзал Промет.

На истата свеченост беа доделени и признанија за спортски достигнувања на Зоран Николовски, Хамид Бакија, Виктор Тевчев и Кирил Манев, истакнати спортисти, тренери и спортски работници кои оставиле траен печат во македонскиот спорт.