Јапонскиот Врховен суд денеска пресуди дека законската клаузула која бара стерилизација на оние кои сакаат законски да го променат својот пол е неуставна. Неколку меѓународни организации, вклучувајќи го Европскиот суд за човекови права, Светската асоцијација на трансродови здравствени работници и Обединетите нации, предупредија дека клаузулата е дискриминаторска и ги крши човековите права.

Но, некои законодавци и групи за правата на жените во социјално-конзервативна Јапонија тврдеа дека пресудата со која се оспорува законот ќе предизвика конфузија и ќе ги поткопа правата на жените. Јапонскиот Врховен суд отфрли сличен случај во 2019 година. Хјуман рајтс воч ја поздрави пресудата и и порача на владата дека мора да ја почитува.

„Владата е должна да ги направи сите закони уставни, затоа треба да дејствува брзо сега за да ја отстрани таа клаузула. Случајот пред 15-те судии дојде по тужба на лице идентификувано само како трансродова жена помлада од 50 години.

Постојниот јапонски закон вели дека на луѓето кои сакаат да го променат полот мора да им биде дијагностицирана родова дисфорија и да исполнуваат пет услови. Овие услови се лицето да има најмалку 18 години, да не е во брак, да нема малолетни деца, да има полови органи кои наликуваат на оние од спротивниот пол, да нема репродуктивни жлезди или трајно да ја изгубило својата функција.

Според извештаите на локалните медиуми, адвокатите на тужителот рекле дека условите го прекршуваат уставното право на нивниот клиент да ја следи среќата и да живее без дискриминација, и дека тие претставуваат значителна физичка болка и финансиски товар за трансродовите лица.

Иако многу земји ги укинаа законите кои бараат задолжителна стерилизација за законско менување на полот, правата на трансродовите лица остануваат контроверзна тема во Јапонија.