На жените во Јапонија годинава им е дозволено да учествуваат на античката церемонија, позната како голиот фестивал, за прв пат во историјата на настанот, иако со неколку модификации.

Секој февруари, илјадници мажи, речиси голи, учествуваат во „хадака мацури“ во шинтоистички храм во Иназава, град во централна Јапонија, за да ги избркаат злите духови во текот на наредната година, пишува Гардијан.

Фестивалот се смета дека е забранет за жени откако првпат се одржал во градот пред околу 1.250 години, но организаторите ќе дозволат група од околу 40 жени да учествуваат на 22 февруари, според извештаите на јапонските медиуми.

Жените, кои ќе бидат целосно облечени, ќе принесуваат ритуални приноси од бамбусова трева, но нема да бидат дел од кулминацијата на фестивалот момиаи, во која мажите облечени само во фундоши (еден вид традиционални гаќи), чорапи и хачимаки бандани се судираат меѓу себе додека се обидуваат да ја пренесат својата лоша среќа на „избраниот човек“, допирајќи го пред да биде повлечен на безбедно.

Ајака Сузуки, која се залагала за правото на жените да учествуваат во овој настан, рече дека сакала да учествува на фестивалот уште од мала. „Можев да учествувам да бев момче“, вели таа за весникот Јомиури Шимбун.

Сузуки додала дека ќе ја искористи можноста да се моли за безбедноста на своето семејство и за луѓето погодени од неодамнешниот смртоносен земјотрес на полуостровот Ното.

Организаторите на безбројните јапонски фестивали се под притисок да се отворат за сите присутни поради загриженоста дека депопулацијата на руралните средини може да стави крај на настаните во кои традиционално доминираат локални мажи.

Овој месец, жените учествуваа на фестивалот на пожарот Кацубе во префектурата Шига за прв пат во нејзината 800-годишна историја.

Но, организаторите на Сомин-саи – кој исто така носат минимална облека – во североисточниот град Ошу минатиот месец објавија дека настанот ќе се одржи за последен пат оваа година.

Даиго Фуџинами, главен свештеник во храмот кој е домаќин на фестивалот стар илјада години, изјави за Маиничи Шимбун дека одлуката била поттикната од напредната возраст на многу локални мажи и недостатокот на луѓе да го надгледуваат настанот.