За време на посетата на индискиот премиер Нарендра Моди на Токио, Јапонија вети дека ќе инвестира 68 милијарди долари во Индија, а двете земји се согласија да ги продлабочат одбранбените врски.

„Огромниот пазар на Индија е толку ветувачки што искористувањето на неговата динамичност ќе помогне во поттикнувањето на растот на јапонската економија“, изјави јапонскиот премиер Шигеру Ишиба пренесуваат индиските медиуми.

Ишиба објави дека Јапонија ќе ги зголеми своите инвестиции во Индија на 10 трилиони јени (68 милијарди долари) и ќе започне иницијатива за соработка фокусирана на полупроводници и вештачка интелигенција.

Билатералната трговија моментално изнесува повеќе од 20 милијарди долари годишно, главно во корист на Јапонија.

Двете страни, исто така, ветија дека ќе ја зајакнат одбранбената соработка, а новинската агенција Кјодо објави дека двете земји се согласиле да развијат заеднички воени вежби.