За прв пат од 1988 година, кога беше следен овој економски индикатор, Јапонија увезла повеќе електроника отколку што извезувала.

Така, во втората половина на 2022 година земјата, забележала трговски дефицит од 605 милиони долари во електронска опрема, покажуваат податоците на Министерството за финансии.

Според нив, во тој период, јапонскиот извоз на електронска опрема изнесува 9,23 трилиони јени (68,8 милијарди долари), што е за 13,9 отсто повеќе во однос на првите шест месеци, додека увозот е зголемен за 17,2 отсто на 9,31 трилиони јени (69,4 милијарди долари), објави Каматица рс.

Најголем дефицит, од 1,79 милијарди јени, е забележан во надворешнотрговската размена на средства за комуникација како паметните телефони, а вишокот (378,4 милијарди јени) во трговијата со чипови и други компоненти.

Ова се изненадувачки податоци, пред се затоа што се работи за земја која важи за една од технолошки најнапредните во светот. Во речиси секоја гранка на производството на сложени уреди и машини, Јапонија има звучно име.

Кога станува збор за камери, тоа е Канон, кога станува збор за електронски уреди за секојдневна употреба, тоа се Сони и Панасоник, а кога станува збор за автомобилската индустрија, листата е уште поширока – Тојота, Мазда, Хонда, Нисан,Сузуки, Мицубиши, Субару…

Сепак, неодамна на светскиот пазар се појавија некои нови имиња, значително поконкурентни, кои полека ги потиснуваат јапонските производители.