Јапонец, кој веќе половина век е осуден на смрт, доби нова пресуда. Според независната организација за човекови права Амнести интернешенел, Ивао Хакамада, кој сега има 87 години, е осуденикот со најдолг стаж во затвор во светот.

Тој бил осуден на смрт во 1968 година за убиство на неговиот шеф, неговата сопруга и нивните две деца во 1966 година. Поранешниот професионален боксер се изјаснил за виновен по 20 дена испрашување во кое, како што тврди, бил малтретиран. Тој подоцна го повлекол своето признание пред судот, пишува „Би-Би-Си“.

Јапонската полиција традиционално се потпира на признанијата на обвинетите за да ги изведе пред суд, но критичарите предупредуваат дека признанијата често се принудени. Во новото судење, судиите ќе разгледаат дали ДНК од крвта пронајдена на облеката што наводно ја носи убиецот се совпаѓа со ДНК на Хакамада. Неговите адвокати тврдат дека анализата не одговара и дека доказите против него се измислени.

Во 1966 година, Хакамада имал триесет години и штотуку се повлекол од боксот откако бил рангиран на шестото место на натпреварување во Јапонија. Се вработил во фабрика за преработка на храна во градот Шимзу, а истата година во јуни, газдата, неговата сопруга и децата биле пронајдени избодени до смрт.

Во 2014 година, Хакамада бил ослободен од затвор, и му било одобрено повторно судење пред окружниот суд, кој утврди дека инспекторите можеби поставиле докази, но таа одлука подоцна била поништена од Вишиот суд во Токио. Адвокатите потоа поднеле жалба и било одобрено ново судење.

„Овој ден го чекав 57 години. Конечно, товарот ми се симна од градите“, изјави сестрата на Хакамада, Хидеко (90), која со години водела кампања во име на својот брат.

Но, процесот на повторно судење може да потрае со години доколку обвинителите се жалат.

„Не можеме да си дозволиме дополнително да го одложиме лекувањето на Хакамада, која сега има 87 години и боледува од ментални и физички заболувања откако помина 47 години во затвор“, рече Мотоџи Кобајаши, шеф на Јапонската адвокатска комора.