Јапонските медиуми јавуваат дека истакнатите домашни производители на автомобили „Хонда“, „Нисан“ и „Мицубиши“, потпишале договор за здружување, со цел да ја задржат конкурентноста на светскиот пазар, преку споделување знаење и технологии, за да постигнат заштеди.

Новата алијанса, врз основа на минатогодишните резултати, има потенцијал да произведува околу 8,35 милиони возила годишно. Со поврзување на трите компании, тие имаат намера најпрво да постигнат рационализација во областа на развој на софтвер за управување со возилата и во електрификација на класичните модели со мотори со внатрешно согорување, но и да си помогнат меѓусебно да ја надополнат својата понуда во видовите возила кои досега им недостасуваа. „Хонда“ и „Нисан“, вториот и третиот по големина производител на возила во Јапонија, веќе во март објавија дека имаат намера да ги здружат силите за да се соочат со зголемените предизвици на пазарот на автомобили, пренесува Каматица.

Сега е јасно дека им се придружила и „Мицубиши“, компанија во која „Нисан“ има голем сопственички удел од 34 отсто и некогаш позната компанија чиј развој беше попречен од низа скандали во минатото и која, како резултат на тоа, сега произведува само околу 810.000 возила годишно (во споредба со, да речеме, 4,1 милиони произведени од „Хонда“).

Главна причина за здружувањето на овие компании се силните потреси во автомобилската индустрија, кои пред сè се манифестираат во преминот од мотори со внатрешно согорување и фосилни горива кон електрични возила. Таа револуција во погонскиот систем ги фати јапонските производители на автомобили во трката за развој на чисто електрични возила, бидејќи уживаат предност на глобалниот пазар благодарение на децениските инвестиции во ефикасни, сигурни, економични мотори со внатрешно согорување и хибриди.

Некои од јапонските менаџери дури веруваа дека во иднина моторите со горивни ќелии и водородно гориво можат да ги надминат електричните возила.