„Целта на сите е Универзитетот „Свети Кирил и Методиј“ да продолжи да се зајакнува и да биде вклучен во листата на 1.000 најдобри универзитети во светот. Ова им го должиме на патроните на Универзитетот и на основачите на словенечката писменост, како и на нивните ученици Климент и Наум, кои во 9 век ја основале Охридската книжевна школа – првиот словенски и најстар европски универзитет“, рече министерката за образование и наука Весна Јаневска на свеченоста по повод 76-годишнината од основањето на Универзитетот и на денот на патронатот на Универзитетот – Денот на сесловенските просветители, светите браќа Кирил и Методиј.

„За Владата и Министерството за образование и наука, подобрувањето на квалитетот на високото образование е висок приоритет. Затоа минатата година го формиравме Националното координативно тело за реформи во високото образование и научните истражувања, кое веќе работи на подготовка на новиот Закон за високо образование. Потребни ни се нови регулативи, професорите и студентите треба да имаат повеќе права, но со ова доаѓаат и уште повеќе обврски“, рече Јаневска, додавајќи дека во подготовка е и нов Закон за научноистражувачка дејност.

Нагласувајќи дека буџетот за образование за оваа година е најголем досега, министерот посочи дека за наука се издвоени 680 милиони денари, што е речиси двојно повеќе од 380 милиони денари минатата година, а веќе се објавени три повици за распределба на средства за имплементација на иновативни научно-истражувачки проекти.

„Вложуваме во повисоки плати за професорите и очекуваме дека сето ова ќе резултира со поквалитетни студиски програми и повеќе научни трудови со фактор на влијание. Преземаме законски мерки против научни институти кои го имаат само зборот наука. Нашата визија е високо образование на европско ниво“, нагласи Јаневска.