Советничката група на СДСМ поднела иницијатива за одржување вонредна седница на Советот на Град Скопје на која ќе се расправа за тешката финансиска состојба во Градот. Ова денеска го соопшти координаторката на советничката група Љубица Јанчева, која го повика ВМРО-ДПМНЕ, партијата која го има мнозинството во Советот, да се охрабри и преку претседателот на Советот Трајко Славески, кој доаѓа од нивните редови, да закаже седница што побрзо, затоа што опасноста од банкрот на Градот секој ден станува сѐ поголема.

Поради неспособноста и расипничкото трошење на народните пари од страна на ВМРО-ДПМНЕ и Данела Арсовска Град Скопје е со блокирана сметка и се наоѓа пред банкрот. Овој факт е уште повеќе поразителен затоа што за една и пол година колку што ВМРО-ДПМНЕ го предводи Градот, нема реализирано ниту еден, потенцирам, ниту еден капитален проект. Дополнително, јавните претпријатија едвај функционираат, јавниот превоз е во колапс, а извесен период не функционираше ниту градската администрација затоа што немаа основни средства за работа. Граѓаните мора да знаат каде завршиле нивните пари. Станува збор од најмалку 100 милиони евра од редовниот Буџет, но и дополнителни 13 милиони евра што претходната градска администрација на СДСМ ги остави во градската каса – нагласи Јанчева.

На прозивката на Јанчева веднаш одговорија од ВМРО-ДПМНЕ.

Љубица Јанчева да не се однесува дека е падната од Марс и на следното гласање на финансиските програми нека се сети на оваа прес конференција и нека постави прашање како Арсовска чии проекти ги гласаат го банкротира градот. А бидејќи имаат одлични релации истово прашање нека го постави на и на ДУИ и на Левица –реагираа од партијата.