Една од најчесто користените растенија во кујните ширум светот, позната по својот ароматичен вкус и свеж мирис, е магдоносот. Освен што ги збогатува јадењата, тој е вистинско богатство на здравствени придобивки – ги прочистува бубрезите и помага во исфрлањето на вишокот вода од организмот, го забрзува опоравувањето од настинки и вирусни инфекции, помага при лош здив, ги ублажува менструалните болки и грчеви, го намалува холестеролот и крвниот притисок, пишува „Живим“.

Магдоносот е богат со витамини А, Ц и К, како и со минерали како железо и калиум, па освен како состојка во супи, чорби, гулаш и сосови, може почесто да се користи свеж, во форма на сок. Без разлика дали го консумирате самостојно или во комбинација со други свежи состојки како целер и лимон, пиењето сок од магдонос е едноставен, но ефикасен начин за поддршка на вашето здравје. Во продолжение се некои од неговите придобивки:

1. Ја зајакнува имунолошката функција

Магдоносот е богат со апигенин, соединение што помага во регулирањето на имунолошкиот одговор и борбата против хроничните воспаленија. Една шолја свеж магдонос обезбедува повеќе од 133% од препорачаната дневна доза на витамин Ц, кој е клучен антиоксиданс за зајакнување на имунитетот и заштита од оксидативен стрес.

2. Го намалува лошиот здив

Поради високата содржина на хлорофил, магдоносот делува како природен дезодоранс, неутрализирајќи го лошиот здив и елиминирајќи ги бактериите што предизвикуваат непријатни мириси.

3. Природен диуретик

Сокот од магдонос е природен диуретик што помага во намалување на крвниот притисок и исфрлање на токсините од телото. Истражувањата покажале дека може да го зголеми волуменот на урина и да го спречи создавањето на бубрежни камења со балансирање на pH-вредноста на урината.

4. Го намалува воспалението

Богат со витамин Ц, бета-каротен и еугенол, магдоносот помага во борбата против воспалителни процеси. Доказите покажуваат дека може да ги ублажи симптомите на остеоартритис, ревматоиден артритис и астма.

5. Ја прочистува крвта

Хлорофилот во магдоносот помага во детоксикација на крвта и создавање на нови црвени крвни клетки. Дополнително, го поддржува здравјето на срцето со спречување на создавање на крвни згрутчувања и намалување на ризикот од кардиоваскуларни заболувања.

6. Го ублажува надуеноста

Магдоносот со векови се користи за третман на дигестивни проблеми, како што се надуеност, гасови и запек. Содржи есенцијални масла што го подобруваат здравјето на цревата и го олеснуваат исфрлањето на гасовите.

7. Ги зајакнува коските

Богат со витамин К, магдоносот го поддржува здравјето на коските преку подобрување на апсорпцијата на калциум и намалување на ризикот од фрактури и остеопороза. Исто така, високиот процент на витамин Ц ја поттикнува продукцијата на колаген, кој е клучен за јачината и флексибилноста на коските.

8. Го поддржува здравјето на бубрезите

Сокот од магдонос е еден од најдобрите природни лекови за бубрезите. Содржи соединенија како апиол и миристицин, кои го поттикнуваат нивното функционирање, го спречуваат создавањето на камења и ја поддржуваат детоксикацијата со зголемување на производството на урина.

9. Ги зголемува нивоата на железо

Магдоносот е исклучително богат со железо – содржи двојно повеќе од спанаќот. Бидејќи железото е клучно за создавање на црвените крвни клетки, сокот од магдонос може да помогне во превенција на анемија предизвикана од недостаток на железо. Високата содржина на витамин Ц ја подобрува апсорпцијата на железото, правејќи го уште поефикасен.

10. Го подобрува видот

Магдоносот е добар извор на провитамин А каротеноиди, вклучувајќи бета-каротен, лутеин и зеаксантин, кои се неопходни за здравјето на очите. Истражувањата покажале дека овие состојки можат да го намалат ризикот од макуларна дегенерација поврзана со стареењето за дури 26 отсто.