Украинскиот претседател Володимир Зеленски, кој изјави дека е подготвен за средба со рускиот претседател Владимир Путин, одби таа да се одржи во Москва, соопштија извори за АФП.

Според три извори, Путин ја предложил Москва како можна локација за состанокот во телефонски разговор со американскиот претседател Доналд Трамп. Зеленски, меѓутоа, нагласил дека не е подготвен средбата да се одржи таму.

Доналд Трамп, кој бил домаќин на Зеленски и лидерите на Германија, Обединетото Кралство, Финска, Франција и Италија, како и на генералниот секретар на НАТО и претседателот на Европската комисија, бил предупреден дека изборот на Москва „не изгледа како добра идеја“.

Се очекува самитот меѓу украинскиот и рускиот лидер да се одржи до крајот на август, но локацијата сè уште не е потврдена.