Израелскиот министер за национална безбедност Итамар Бен Гвир денес изјави дека сака да изгради луксузна населба за израелските полицајци на урнатините на Појасот Газа.

„Ќе ја завршиме мисијата, ќе ја окупираме Газа, ќе ја охрабриме доброволната емиграција“, им рече крајнодесничарскиот министер на собраните високи полициски службеници на здравица за Рош Хашана, еврејската нова година што се слави на 22 септември, објави „Тајмс оф Израел“.

Тој рече дека Израел сака „да воспостави и населба за полицајци во Газа“, која, според него, ќе биде „луксузна“, со високи згради со поглед на Средоземното Море.

„Дојде време за населба – еврејска населба, дојде време да се охрабри доброволната емиграција (на жителите на Газа), дојде време да се воведе смртна казна за терористите“, рече Бен Гвир.

Тој минатата недела објави дека ќе преземе понатамошни мерки за предложениот закон за спроведување на смртна казна за терористите, по нападот врз автобус во Ерусалим минатата недела.
Предлог-законот ќе биде разгледан утре во Комитетот за национална безбедност на Кнесетот.