Израелскиот министер за одбрана, Израел Кац, изјави дека Појасот Газа ќе биде „срамнет со земја“ ако Хамас не се предаде и не ги ослободи заложниците што ги држи 23 месеци.

„Ако терористите на Хамас не го положат оружјето и не ги ослободат сите заложници, тие ќе бидат уништени, а Газа ќе биде срамнета со земја“, рече Кац денес во објава на социјалната мрежа X.

Според палестински извори, во понеделник беа погодени неколку високи згради, додека Израелските одбранбени сили (ИДФ) потврдија напади врз две згради.

Во текот на изминатите неколку дена, ИДФ изврши повеќекратни напади врз солитерите во Газа, за кои тврди дека ги користи Хамас за спроведување операции против израелските трупи, откако претходно ги предупреди жителите да ја напуштат областа.

„Триесет високи згради што се користеа за терористички активности беа нападнати и уништени, а десетици дополнителни цели беа бомбардирани за да се оневозможи надзорот и да се нападне инфраструктурата, како и да се отвори патот за копнените сили“, рече Кац во објава на социјалната мрежа X, заедно со видео на кое се гледа уривањето на солитер во градот Газа.