76-годишна велешанка останала без 10.000 евра откако му ги дала на измамник, кој ѝ се јавил на телефон и ѝ кажал дека нејзината ќерка направила сообраќајна несреќа, соопшти МВР.

„На 03.09.2025 во 18:20 часот во СВР Велес, 76-годишна жена од Велес пријавила дека била измамена од едно лице за сума од 10.000 евра. Според пријавеното, измамникот ѝ се јавил на фиксен телефон, се претставил како полициски инспектор и ѝ кажал дека нејзината ќерка со сопругот направиле сообраќајна несреќа и притоа прегазиле мало дете и дека треба да плати за да не бидат пријавени во полиција. Според пријавеното, откако се договориле, ги однела на договореното место, а откако ја слушнала ќерка си сфатила дека била измамена. Се преземаат мерки за расчистување на случајот“, пишува во полицискиот билтен.

Само од почетокот на годинава, измамници на сличен начин извлекоа суми пари од десетици повозрасни жители на Македонија, а полицијата досега не реши ниту еден таков случај.