Амбасадорот Дејвид Гир, шеф на Делегацијата на Европската Унија, и првата дама Елизабета Ѓоргиевска на 10 март ја отворија изложбата „Розови тигри и златни гуштери и сè друго“ во резиденцијата на ЕУ во Скопје.

Изложбата е дел од кампањата за Зелениот договор што Делегацијата на ЕУ ја започна во ноември минатата година, повикувајќи на силна политичка посветеност и итна акција на сите нивоа во справувањето со климатските промени. Главната тема на изложбата е спречување на колапсот на биодиверзитетот, што е меѓу основните цели на Европскиот зелен договор.

Уметниците, избрани од скопската галерија „Акантус“, имаа можност да ги изразат своите грижи поврзани со животната средина, а инспирирани од Европскиот зелен договор. Вана Урошевиќ и Зоран Тодовиќ, Велимир Жерновски, Маја Кировска, Ненад Тонкин и Озбек Ајваз, изработија уникатни уметнички дела што ќе послужат како мотив за размислување при интерактивните дебати што Делегацијата на ЕУ ќе ги организира во следните три месеци.

Работилниците ќе бидат место за дискусија за најрелевантните прашања поврзани со Зелениот договор во Северна Македонија, како и за можните решенија. Ќе вклучуваат деца, студенти, претставници на граѓанското општество, властите и академските кругови. Изложбата ќе биде отворена за јавноста до 20 мај 2022 година.

Во своето обраќање, Ѓоргиевска истакна дека изложбата е уште една потврда дека уметниците и нивните дела не постојат одделено од сликите на времето во кое дејствуваат и се обликуваат, туку тие се преиспитување и во критичка рефлексија со вистините што ги нуди контекстот во кој постојат.

– Токму низ оваа изложба, низ оваа творечка реакција согледуваме како уметниците со своите дела ја проникнуваат застрашувачката слика што ја живееме – еколошката смрт, ресурсната неодговорност, човековото понижување – интервенирајќи во понатамошните текови и во промените поврзани со општественото тело – истакна Ѓоргиевска, додавајќи дека културата и етимолошки упатува на негување, култивирање, создавање модели кои ќе ја облагородат планетата, а со тоа ќе придонесат и за грижливо и балансирано развивање на биодиверзитетот и затоа уметничкото творештво треба да се смета за интегрален агенс на зелените политики.

(Текстот е објавен во „Културен печат“ број 120, во печатеното издание на весникот „Слободен печат“ на 12-13 март 2022)