Во големиот салон на Музеј на град Скопје на 9 октомври, во 20 часот, ќе биде отворена изложбата на цртежи со наслов „Летаргија“ од Ангел Коруновски. Промотори на изложба се Сашо Димоски и Јасмина Намичева, а истата ќе може да се посети до 23 октомври.

Зародиш на концептот на изложбата е глобализацијата, пласирањето на лажни информации и вредности, како и потценувањето на луѓето и нивните способности.

– Осознавањето преку брза информација без потковување на знаењето кое изискува време и истражување претставува глобален проблем во целото општество кое се движи во погрешен правец, комплетна капитализација и вреднување на материјални добра како основен идентитетски печат кај единките.

Живееме во време на брзи вистини, подадени и наложени вредности, нема индивидуалност, луѓе слични кои функционираат како бинарен број кој е зададен да создаде една наметнато поставена слика. Делата на изложбата се сурови, искрени и голи како нужна потреба на отсликувањето на општеството, впрочем, нели културата е образ, огледало на времето и општеството во кое живееме? – загатнуваат промоторите на изложбата.

Цртежите се работени во комбинирана техника каде тушот и перото се појдовна точка, додека алатките, како Procreate & Photoshop, прават кулминација во создавањето на една монументална творба во дигитален формат.

– Се надевам дека публиката ќе ужива во едно негување на класичниот начин на творење преку фундаментот на ликовниот начин на изразување – Цртежот репрезентиран во нов начин на презентација како дигитална монументална уметност – истакнува авторот Ангел Коруновски.

Дизајнот на плакатот за изложбата е на Лазе Трипков. Проектот е поддржан од Министерството за култура и туризам, Музејот на град Скопје, винаријата „Тристо“ и Општина Велес.