Италијанскиот заменик министер за култура е обвинет за поседување и изложување на украдена слика од 17 век, што тој го негира. Последните обвинувања за член на италијанската влада се насочени кон Виторио Сгарби, познат уметнички критичар.

Сгарби е ставен под истрага за поседување украдено уметничко дело откако ја вклучил сликата на изложба во 2021 година. Делото „Заробувањето на Свети Петар“ било пријавено дека е украдено во 2013 година, пренесува Би-Би-Си.

Сликата на Рутилио Манети – следбеник на барокниот мајстор Караваџо – порано била изложена во замок во северниот италијански регион Пиемонт.

Сгарби, кој исто така е познат по својот непристоен јазик и неколкуте пресуди за клевета, исто така е обвинет за менување на делото со додавање свеќа на горниот агол, наводно за да се скрие неговото потекло.

Политичарот вели дека го нашол делото додека ја реставрирал вилата купена од неговата мајка пред повеќе од дваесет години. Тој тврди дека сликата е оригинал, додека украдената во 2013 година била копија.

Наводите се појавија во истрагата на програмата „Репорт“ на италијанската телевизија Раи. Сопственичката на замокот, која пријавила украдена слика, им кажала на новинарите дека платното било исечено од рамката во 2013 година. Таа исто така рече дека пријател на Сгарби претходно го посетил имотот и изразил интерес да го купи делото.

„Репорт“, исто така, наведе дека открил дека друг пријател на политичарот подоцна ја пренел оштетената слика „Заробувањето на Свети Петар“ на реставратор. Било кажано дека има дупка со иста форма како парче од платното исечено од рамката на замокот Пиемонт во 2013 година.

До моментот кога обновеното дело било изложено од Сгарби во 2021 година, на сликата било додадена свеќата во горниот агол.

Заменик министерот сега се соочува и со обвинувања за друго дело: слика која му се припишува на францускиот уметник Валентин де Булоњ, проценета на 5 милиони евра, која била запленета од полицијата во Монтекарло. Сгарби е под истрага на обвинител за незаконски извоз на сликата. Тој вели дека тоа е копија – и дека не му припаѓала.

Опозициските партии повикаа на смена на Сгарби, а Движењето пет ѕвезди рече дека ќе поднесе предлог во парламентот за негово разрешување.

Ова е втор срам што ја погоди италијанската влада оваа година, откако пратеник од владејачката партија беше ставен под истрага за земање пиштол на новогодишната забава, при што пукнал и повредил колега. Емануеле Поцоло негираше дека пукал од оружјето, но сега е суспендиран од премиерката Џорџа Мелони.

Партијата Браќата на Италија на Мелони сè уште е високо во анкетите и нејзината десничарска коалиција изгледа стабилна – засега.