Италијанскиот Сенат едногласно го усвои предлог-законот со кој фемицидот – убиство на жена поради нејзиниот пол, се дефинира како посебно кривично дело во Кривичниот законик и се казнува со доживотен затвор, пишува Раи Уно.

Според новиот член, фемицид е убиство извршено врз жена поради омраза, дискриминација, обид за контрола, или едноставно затоа што е жена. Како фемицид ќе се смета и убиство поради одбивање на емотивна врска или обид за ограничување на личните слободи на жртвата.

Законот исто така предвидува укинување на 45-дневниот лимит за прислушување во случаи на тешко насилство врз жени, со цел да се овозможи поефикасна истрага и кривично гонење на сторителите.

Предлог-законот сега се проследува до Долниот дом на парламентот, а по неговото евентуално усвојување, ќе треба да биде потпишан од претседателот на државата за да стапи во сила.