Италија за прв пат планира да ги оданочува проститутките. Италијанскиот завод за статистика воведе сопствен деловен код ATECO за активности поврзани со сексуални услуги. Шифрата ATECO е систем за класификација што се користи за јасно дефинирање и оданочување на економските активности на компаниите и хонорарците, јавуваат странските новински агенции. Новиот код ги опфаќа брачните агенции, агенциите за свадби, сексуалните услуги и активностите за брзо запознавање, пренесува австриската новинска агенција АПА. Во Италија проституцијата е легална, но не е регулирана, а борделите и макроата се забранети.

Како што пренесува Ројтерс, сега се очекува сексуалните работници да добијат даночен број и да се обидат да го регулираат својот статус врз основа на класификацијата на активности усвоена од италијанските власти. Во Италија, сексуалните работници често немаат пристап до работничките права и не можат да ги пријават своите приходи или да плаќаат даноци, што е во целосна спротивност со другите европски земји како Холандија и Германија, каде што проституцијата е регулирана, наведува „СЕЕ.биз.еу“. Овој потег беше критикуван од италијанската опозиција.

„Италијанската десница се залага за Бога, државата и семејството, но кога треба да ја наполни својата каса, дури и ја легализира проституцијата“, рече Луана Занела од Лево-зелената алијанса (АВС).

Таа додаде дека покојниот социјалистички сенатор Тина Мерлин, чии закони ги затворија борделите во 1958 година, „ќе се врти во својот гроб“. Поради процутот на уличната проституција во Италија, веќе неколку години се води дебата за можноста за повторно отворање на борделите и нивната строга контрола. Како што јави АПА, се проценува дека во Италија има до 100.000 проститутки, од кои една третина доаѓаат од странство. Повеќе од половина од нив работат на улица, а околу една петтина се малолетни.