Околу 25.000 кубни метри дрва се бесправно исечени, или народски кажано украдени од националното богатство само во 4 општини во последните 6 години, покажува истражувањето што го презентираше Центарот за европски стратегии – Евротинк. Ако се земе предвид цената од околу 40 евра за квадратен метар во малопродажбата, тоа значи дека вредноста на украдените дрва е 1 милион евра.

– Има една воспоставена традиција што постепено се менува и добива различни форми. Тоа е повеќеслоен криминал, кој не е сузбиен поради индолентноста на властите пред сѐ на локално ниво. Нашето истражување укажа дека делумно во некои аспекти, организациски и координативни, се вклучени и тие. Интересно е што организираниот криминал е поорганизиран од државата – рече за „Слободен печат“ истражувачот Мариглен Демири.

Со цел утврдување на состојбите на терен, во истражувањето се опфатени интервјуа на лица од Струмица, Велес, Прилеп и од Гевгелија, а кои на директен или индиректен начин се инволвирани во оваа проблематика, а меѓу нив има и такви што во минатото биле активни учесници во бесправна сеча. Истражувањето поттикна формирање Координативно тело за решавање на криминалот со бесправната сеча на шуми, во кое учествуваат сите надлежни владини институции за откривање, докажување и сузбивање на оваа појава.

Што се однесува до мотивите и профилот на сторителите, Демири рече дека тоа е профитот, но пред сѐ катастрофалната социјална состојба на сторителите. Организаторите се оние што се стекнуваат со материјална корист, а самите сторители имаат потреба да обезбедат огрев за своите домови. Тој додава дека некои од организаторите претходно се занимавале со дрога, па се префрлиле на овој нелегален бизнис како побезбеден оти бесправната дрвосеча се казнува прекршочно, а ретко кога се гони и кривично.

Истражувањето покажува дека овој криминал не само што се прелева од општина во општина, туку е и транснационален имајќи ги предвид организациските структури што се занимаваат со нелегална сеча.

Инаку, проектот „Истоштени шуми – мапирање на организиран криминал во форма на нелегална сеча“ е финансиски поддржан од Канадскиот фонд за локални иницијативи преку Амбасадата на Канада од Белград.