Најновата студија на „Цепер“, спроведена во 12 земји во регионот, Барометар на страв 2024, ги открива најголемите грижи на населението во Централна Европа. Најголема грижа се климатските промени и глобалното затоплување – овие прашања беа идентификувани како најзагрижувачки во четири земји: Унгарија (3,55), Хрватска (3,18), Србија (3,13), како и Црна Гора (2,75). Во Северна Македонија, економските тешкотии водат на листата на стравови со исклучително висок индекс од 3,86. Сличен тренд е забележлив во Полска (3,56) и Романија (3,46), каде што исто така доминира економската несигурност.

Геополитичките тензии, особено конфликтот меѓу Русија и Украина, дополнително го зголемија нивото на вознемиреност во регионот. Загриженоста за „војната во соседна земја“ постојано се зголемува – во 2020 година, 27 отсто од испитаниците ја идентификувале војната како една од нивните најголеми грижи, во 2021 година тој процент се зголемил на 31 отсто, додека во 2024 година речиси половина од испитаниците пријавиле значителна загриженост поради овие закани, објави Политика.рс.

Интересно е што Бугарија е единствената земја во која доминира стравот од војна, а во Австрија тоа место го заземаат миграциите. Миграцијата е најмалку избраната опција од страна на испитаниците во нашата земја. Студијата покажува и дека за жителите на Централна Европа најмал проблем е осаменоста. Генерално, според индексот заснован на 11 идентификувани стравови, најмалку се плашат Црногорците (-0,53), додека Македонија, покажала најголем страв (0,7).