Британските работници продолжуваат да работат од дома повеќе од која било друга земја во светот, пет години по ковид-пандемијата којашто за прв пат го наруши традиционалното канцелариско работење, покажува студијата на Глобалното истражување на работните аранжмани (G-SWA), заснована на анкета на работници ширум светот.

Вработените во Велика Британија сега работат од дома во просек 1,8 дена во неделата, што е над меѓународниот просек од 1,3 дена, според глобално истражување на повеќе од 16.000 работници со полно работно време, со универзитетско образование низ Европа, Америка, Азија и Африка, објави „Гардијан“.

Според анкетата на G-SWA спроведена помеѓу ноември 2024 и февруари 2025 година, хибридниот модел на работа е особено распространет во земјите што зборуваат англиски јазик, вклучувајќи ги Велика Британија, САД, Канада и Австралија.

Истражувањето, исто така, покажа дека ваквите аранжмани се ретки во Источна Азија, каде што преовладува култура центрирана кон канцеларијата и каде што повеќето работници со полно работно време во Јапонија и Јужна Кореја сè уште патуваат секојдневно.

И покрај воведувањето на строги обврски за враќање на работа во неколку големи компании, вклучувајќи ги американскиот малопродажен синџир „Амазон“ и фирмата за управување со средства „БлекРок“, нивото на работа од дома во Велика Британија почна да се стабилизира од 2023 година, во она што истражувачите го нарекоа „рамнотежа на пазарот на трудот“.

Анкетираните вработени родители рекле дека се посклони кон хибридна работа, додека оние без деца претпочитаат или целосно канцелариски или целосно домашен модел на работа, а во исто време, помладите испитаници покажаа поголема преференција за работа од канцеларија.

Резултатите од истражувањето беа објавени откако посебна анкета спроведена од колеџот Кингс покажа дека помалку од половина или 42 проценти од работниците би се согласиле со барањето на работодавачот да се вратат во канцеларија со полно работно време, во споредба со 54 проценти на почетокот на 2022 година.