Владата на францускиот претседател Емануел Макрон ги прикриваше одлуките за нелегалниот третман на минерална вода, со кој се занимаваше гигантот на прехранбената индустрија „Нестле“, вклучувајќи го и светски познатиот бренд „Периер“, објави истражната комисија на Сенатот.

Извештајот анализира повеќегодишни мерки преземени од „Нестле“ за да се избегне бактериска или хемиска контаминација на водата што ја означува како „природна минерална вода“ или „изворска вода“ од брендовите Контрекс, Вител и Хепар.

Ваквите третмани се забранети со француските и европските прописи. Во извештајот се заклучува дека француската влада ја прикрила „нелегалната практика“, објави Данас.

Регулативата на ЕУ бара природната минерална вода да не биде подложена на никаква дезинфекција или третман што би можел да ги промени нејзините карактеристики.

Француските медиуми минатата година објавија за забранети третмани. Во извештајот на Сенатот се наведува „намерна стратегија“ за прикривање уште од првиот состанок на кабинетот за ова прашање во октомври 2021 година. Неколку месеци подоцна, властите се согласија со планот на „Нестле“ да ги замени забранетите третмани со микрофилтрација.

Минатата година, таа швајцарска компанија јавно призна дека користела третмани со минерална вода и се согласи да плати казна од два милиони евра за да избегне судска постапка.

Истражната комисија разговараше со повеќе од 120 службеници запознаени со проблемот, а само едно лице одби да зборува: Алексис Колер, тогашен генерален секретар на претседателската палата во Елисеј, за кој се вели дека разговарал неколку пати со раководителите на „Нестле“. Комисијата заклучи „дека Претседателството на Републиката знаело барем од 2022 година дека „Нестле“ мами со години“.