Возачот на Априлија, Алеш Еспаргаро дојде до првата победа во кариерата во кралската класа откако славеше на трката за Големата награда на Аргентина. Ова воедно беше и прва победа за Априлија во Мото ГП класата.

Шпанецот до првиот триумф дојде во 200. трка во кралската класа, а вкупно 283 трка во кариерата. Шпанецот победи со само осум десетинки пред Хорхе Мартин од Прамак Дукати.

Интересно е што на стартот од сезоната, Алеш Еспаргаро беше единствениот возач во кралската класа кој ниту еднаш во кариерата не успеал да победи на една трка.

Последното место на победничкиот подиум го освои возачот на Сузуки, Алекс Ринс кој задоцни половина секунда зад најдобрите двајца возачи.

Трката помина во битката понемеѓу Алеш Еспаргаро и Мартин кој водеше во најголем дел од трката. Постариот од браќата Еспаргаро трпеливо ја чекаше шансата и кога му се укажа таква шанса на пет круга до крајот, ја искористи и не му дозволи на Мартин да го претекне.

Четвртото место го освои Жоан Мир на Сузуки, а петти беше возачот на Дукати Франческо Бањаја.
Шестото место му припадна на возачот на КТМ, Бред Биндер кој беше пред Маверик Вињаљес и бранителот на титулата Фабио Квартараро.

Со триумфот во Аргентина, Алеш Еспаргаро го презеде водството во генералниот пласман со 45 бода, седум повеќе од Биндер и девет повеќе од Бастијанини и Ринс.

Следната трка во Мото ГП класата ќе се вози наредниот викенд и тоа во Остин, Тексас за ГН на САД.
Во Мото2 класата победи возачот на ВР46, Челестино Виети пред двајцата возачи на Хонда Азија, Сомкијат Чантра и Аи Огура.

Во Мото2 класата славеше Серхио Гарсија пред Денис Фиџа и Ајума Сасаки.