Исланд има доволно јавна поддршка за обновување на преговорите за приклучување кон Европската Унија, изјави денес министерката за надворешни работи на земјата, Торгедур Катрин Гунарсдотир, пред посетата на претседателката на Европската комисија, Урсула фон дер Лајен, на островската држава.

Нејзината посета, според „Политико“, ќе се случи во време кога Исланд ги разгледува последиците од трговската војна меѓу нејзините два најголеми трговски партнери, САД и ЕУ, со растечки притисок од Вашингтон за зајакнување на својата одбрана, како и заканите на американскиот претседател Доналд Трамп за анексија на соседниот Гренланд.

„Би рекла дека постои јавна поддршка за повторно отворање на преговорите“, изјави Гунарсдотир за бриселскиот портал, нагласувајќи дека обновувањето на преговорите „е од суштинско значење во контекст на геополитичката ситуација“.