Околу 400 илјади вработени во авио – компаниите се отпуштени од работното мести или им е најавено дека ќе ја изгубат работната позиција поради корона вирусот, оценува „Блумберг“.

Тоа е затоа што авио индустријата претрпи најголеми загуби, воздушниот сообраќај долго беше во целосен прекин, а и сега патниците се претпазливи кога ги планираат своите патувања кога станува збор за начинот на кој би патувале.

Делумно затоа што се плашат да бидат во „воздух“ на мал простор со многу непознати луѓе, а добар дел и затоа што им сметаат новите мерки и процедури кои се однесуваат на начинот на кој сега функционираат аеродромите и правилата во авионите.

Покрај тоа, постепено почнува да исчезнуваат и бизнис моделите кои им носеа голем профит на авио – компаниите, односно корпоративните летови. Потребата за деловни патувања се повеќе ќе се намалува, меѓу другото и поради работењето на далечина, односно состаноците преку видео – конференциски врски.

Како што наведува „Блумберг“ овој сегмент е најпрофитабилен, бидејќи компаниите беа подготвени да платат неколку илјади долари за „ласт – минут“ билети. Всушност, деловните патувања сочинуваат 60 – 70 проценти од продажбата на авио – билети, проценува трговската група „Ерлајнс“.