Претседателката Гордана Сиљановска-Давкова денеска го прими Томас Бирн, државен министер за европски прашања и одбрана на Ирска со кого размениле мислења за севкупните билатерални односи, како и за процесот на пристапување кон Европската Унија.

Како што се наведуав во соопштението од кабинетот на Претседателот, Сиљановска Давкова оценила дека политичките односи меѓу двете земји се пријателски и без отворени прашања, но со скромна динамика и посочила на потребата од интензивирање на контактите на највисоко политичко ниво. Таа ја истакнала потребата за поголема економска соработка и трговска размена меѓу двете држави.

„Сиљановска-Давкова се заблагодари за принципиелната и континуирана поддршка од Ирска за нашите аспирации за членство во Европската Унија. Потсети дека и по 21 година од формалната апликација за членство за време на ирското претседателство во 2004 година, процесот е заглавен во лавиринт од двојни стандарди. Барајќи фер шанса за земјата, таа изрази надеж дека Ирска, за време на нејзиното претседателство во втората половина на 2026 година, како поддржувач на политиката на проширување ќе продолжи да се залага за кредибилен процес на пристапување, базиран на заслуги, се наведува во соопштението.Таа уште еднаш укажала на опасноста по процесот на проширување, од неговата билатерализација и оптовареност со идентитетски и историски прашања“, пишува во соопштението.